’ಹೇಮಲಂಬವೋ ಹೇಮಲಂಬಿಯೋ ಎಂಬ ಜಿಜ್ಞಾಸೆಗೆ ಉತ್ತರವೀಯುವ ನನ್ನ ಲೇಖನವೊಂದನ್ನು ನಿನ್ನೆ ಹಂಚಿಕೊಂಡಿದ್ದೆ. ಅದರಲ್ಲಿ ಹೇಮಲಂಬ ಶಬ್ದ ಸರಿಯೆಂದು ಪುಷ್ಟೀಕರಿಸುವ ಹಲವು ಪ್ರಯೋಗಗಳನ್ನೂ ಉಲ್ಲೇಖಿಸಿದ್ದೆ. ಆದರೆ, ದೈವಜ್ಞವಿಲಾಸವೆಂಬ ಸಂಗ್ರಹಗ್ರಂಥದಲ್ಲಿ ಹೇಮಲಂಬಿಶಬ್ದವಿದೆ -

ಹೇಮಲಂಬಿನಿ ಭೂಪಾಲಾಃ ಪರಸ್ಪರವಿರೋಧಿನಃ |

ಪ್ರಜಾಪೀಡಾ ತ್ವನರ್ಘತ್ವಂ ತಥಾಪಿ ಸುಖಿನೋ ಜನಾಃ ||

(ಈ ಗ್ರಂಥಸಂಪಾದನೆಯಲ್ಲಿ ತೊಡಗಿರುವ ಮಿತ್ರರಾದ ಶ್ರೀಯುತ ಈಶ್ವರಚಂದ್ರ ಜೋಯಿಸರಿಂದ ಸಿಕ್ಕ ಮಾಹಿತಿಯಿದು.)  

ಅಲ್ಲದೆ, ಬೃಹತ್ಪಂಚಾಂಗಫಲಾದರ್ಶವೆಂಬ ಗ್ರಂಥದಲ್ಲಿಯೂ –

ಪರಸ್ಪರಂ ಕ್ಷಿತೀಶ್ವರಾ ವಿರೋಧಿನಃ ಸುಖೀ ಜನಃ |

ಸೃಜಂತಿ ವಾರಿ ಚಾಂಬುದಾಸ್ತ್ವತೀವ ಹೇಮಲಂಬಿನಿ ||

ಎಂದು ಹೇಮಲಂಬಿಶಬ್ದವೇ ಇದೆ.

ಇವೆರಡರಲ್ಲಿಯೂ ಸಂವತ್ಸರಗಳ ಹೆಸರನ್ನು ಉಲ್ಲೇಖಿಸುವಲ್ಲಿಯೂ ’ಹೇಮಲಂಬೀ ವಿಲಂಬೀ ಚ’ ಎಂದೇ ಹೇಳಲಾಗಿದೆ.

ಹೀಗೆ ಹೇಮಲಂಬ ಮತ್ತು ಹೇಮಲಂಬಿ - ಈ ಎರಡೂ ಶಬ್ದಗಳಿಗೂ ಪ್ರಯೋಗ ಪ್ರಾಮಾಣ್ಯ ಸಿಗುವ ಕಾರಣ ಎರಡನ್ನೂ ಅಂಗೀಕರಿಸುವುದು ಸೂಕ್ತವಾಗುವುದು.